Olympic Notos er eit toppmoderne, hybriddrive CSOV-fartøy basert på ULSTEIN SX222-designet, som vart bygd av Ulstein Verft og levert til Olympic i 2024. Skipet har sidan vore kontinuerleg i drift og har vist framifrå drivstoffeffektivitet i operasjonar, og har fått svært gode tilbakemeldingar frå store kundar innan offshore vind. Kundane framhevar spesielt fartøyet si unike kombinasjon av komfort, operabilitet og effektivitet – både når det gjeld drivstoff og operasjon.
Skipet skal vidare nyttast som Walk-to-Work (W2W)-fartøy for ubemanna produksjonsplattformer på norsk kontinentalsokkel, der Olympic er tildelt ein femårig charterkontrakt med AkerBP. Skipet må tilpassast for å møte spesifikasjonar og krav som vert stilte for slike innretningar på norsk sokkel. Fartøyet er spesialdesigna med lågt utsleppsnivå, høg operabilitet og svært gode buforhold – ideelt for heilårsoperasjonar under krevjande forhold i Nordsjøen, der gangvegen skal vere permanent tilkopla plattforma så lenge det er personell om bord på innretningane. W2W-løysinga vil òg fungere som primær rømmingsveg.
Vi har jobba godt med Olympic sidan januar 2025 og fram til kontraktsigneringa for å møte spesifikasjonar og krav som krevst for at skipet skal vere klart til denne typen oppdrag,
fortel områdesalssjef ettermarknad Marita Myrvågnes i Ulstein Verft.
Den omfattande ombygginga er alt i gang, med designarbeid frå Ulstein Design & Solutions. Ulstein Verft vil gjennom hausten prefabrikkere delar som skal nyttast i prosjektet. Sjølve ombygginga vil finne stad på nyåret 2026, og skipet skal vere klart for oppdrag offshore våren 2026.
