Brennestarten på Ulstein Verft sitt byggnummer 328 markerer ein viktig milepåle i prosjektet, der fartøyet går over frå design-, engineerings,- og planleggingsfasane til produksjon.
Fartøya er baserte på ULSTEIN SX252-designet og er utvikla for installasjon av undersjøiske fiberoptiske kablar. Kvart fartøy er 130 meter langt og 22 meter breitt, med ein kabelkapasitet på opptil 6500 tonn.
Prosjektet vart gjort kjend i januar 2026 då det Malaysia-baserte reiarlaget OMS Group signerte kontraktar med Ulstein om design og bygging av to framtidsretta kabelleggingsfartøy. Fartøya er utvikla for å møte den aukande globale etterspurnaden etter digital infrastruktur gjennom installasjon og vedlikehald av undersjøiske fiberoptiske kabelnettverk. Levering frå Ulstein Verft er planlagd i 2028.
– Vi er nøgde med at bygginga av det første skroget no er i gong. Seremonien ved brennestart er eit viktig steg i prosjektet, og vi set stor pris på det gode samarbeidet med CRIST, seier Lars Lühr Olsen, administrerande direktør ved Ulstein Verft.
Systemleveranse frå Ulstein Power & Control
Med systemleveransen frå Ulstein Power & Control får fartøya integrerte kraft-, automasjons- og energistyringssystem utvikla for avanserte kabelleggingsoperasjonar. Kombinasjonen av ULSTEIN® POWER Variable Speed Generator-teknologi og batterisystem bidreg til energieffektiv og påliteleg drift, samstundes som drivstofforbruk og utslepp vert reduserte.
Fakta
- Kunde: OMS Group, Malaysia
- Byggnummer: 328
- Design: ULSTEIN SX252
- Lengd: 130 m
- Breidde: 22 m
- Kabelkapasitet: Opptil 6500 tonn
- Skrogverft: CRIST, Polen
- Utrustingsverft: Ulstein Verft, Noreg
- Planlagd levering: 2028
