Den 2. januar vart byggnummer 322, eit vindserviceskip (CSOV), slept ut frå dokkhallen til ytre dokk. Tungløftsavdelinga monterte deretter tårnet på nybygget med bruk av si kraftige beltekran som har kapasitet opp til 600 tonn. 7. januar vart fartøyet slept vidare ut på sjøen og lagt til kai. Samstundes vart søsterskipet, byggnummer 323, dokka inn i dokkhallen for vidare arbeid.
Om fartøya
Bygg 322/323 er baserte på Ulstein sitt SX222-design med TWIN X-STERN®-løysinga. Denne teknologien gir høg drivstoffeffektivitet og reduserte rørsler for tryggare og meir komfortable offshoreoperasjonar. Skipa har hybrid batteridrift og er førebudde for grøn metanol, noko som gjer dei framtidsretta med tanke på lågutsleppsløysingar. Med rørslekompensert gangbru, heistårn, 3D-kran og optimalisert logistikk blir fartøya ein fleksibel plattform for drift- og vedlikehaldsoppdrag (O&M) og støtte til konstruksjonsarbeid i havvindparkar.
