Frå skrog til høgteknologi
- Det har vore nokre hektiske, men strukturerte, månader sidan skroget kom i mai, seier prosjektleiar Helge Torvik ved Ulstein Verft. - Erfaringa frå det første prosjektet er veldig verdifull for oss, og eg er fornøgd med det vi har oppnådd så langt.
Prosjektleiaren forklarar at skroget gradvis har vorte omdanna til eit toppmoderne fartøy under opphaldet i dokkhallen. Beskytta mot vêret har utrustingsarbeid som rørlegging og mekaniske installasjonar, innreiing, elektriske installasjonar og utvendig målararbeid vorte utførte i samsvar med planen. Den neste fasen er igangkøyringsfasen, som allereie har starta.
Om fartøya
Kontrakten mellom Olympic og Ulstein vart signert i 2022 og inneber design, engineering og bygging av to CSOV-skip ved Ulstein Verft. Skroga vert bygde ved Crist-verftet i Polen. Fartøya har dieselelektrisk framdrift med variabelt turtal i kombinasjon med store batterisystem. Ulstein Power & Control skal levere ein omfattande kraft- og automasjonspakke, inkludert ein stor batterileveranse til skipa.
Fartøya er baserte på ULSTEIN SX222-designet frå Ulstein Design & Solutions AS. Dei har ei lengd på 89,6 meter og ei breidd på 19,2 meter og har plass til 126 personar fordelte på 91 lugarar med dagslys.
Skrogforma og det hybride framdriftssystemet vil sikre høge operasjonelle ytingar, gode sjøeigenskapar og redusert avtrykk.
Om selskapa
Fosnavågreiarlaget Olympic har ein flåte som opererer i marknaden for subseaservice og fornybar energi. Ulstein Group er ei gruppe maritime selskap med hovudkontor i Ulsteinvik.
